Mercurial Vapor 15已經推出，Bootmeister係呢到為大家簡短分析一下呢個更新嘅主要分別，等大家了解下舊版新版嘅特點！最簡單一句，新版Vapor 15有新增Zoom緩震同係鞋底上有改進，但係有一個細微位置有取捨。
圖二：鞋面
雖然兩代鞋面都以稱為Vaporposite嘅合成物料所鞋面，但第一眼睇就已經見到有細微分別。14代嘅網格紋理非常鮮明，推論應該係以兩層嘅物料組成，而去到15代雖然鞋面都有凹凸感加強摩擦，但可以見到鞋面嘅構造更薄，係而一體成型嘅Vaporposite加上3D壓印而造，估計係因為想減重而做，摩擦力未知會否因此減低。
圖三及四：鞋型及鞋楦
呢到要講清楚兩樣野！一，兩代Vapor嘅鞋楦，即鞋模/內籠嘅形狀，係我地嘅目測下係無改變；二，Vapor 15著落感覺上會比較闊身！細心朋友會諗到點解兩樣野唔係應該有衝突架咩？無錯！首先，圖中兩對一樣尺碼嘅Vapor，大家可以大體見到鞋身闊度大致相同，而我地量度過後都可以確定呢樣野，同時，鞋側位嘅線條形狀等等都係目測無改變，可以推論鞋模應該係無大變化，咁點解著落會闊身少少？請睇睇圖四就知架喇。Vapor 14代設計係運用左一個輕量化嘅鞋底，所以見到鞋底中部係只以一條TPU連接，設計上係想減重，但因此，鞋籠腳內側會收左少少入去，結果就會貼腳啲；相反，Vapor 15代今次運用返Vapor 11代以後已經停用既全掌式鞋底設計，鞋籠係鞋內側呢個位會較飽滿，因為係呢個部份嘅鞋底係加闊咗。
圖四：鞋中底
最主要嘅形狀上分別，上段已經詳述！鞋釘擺位及設計都有改良，係鞋頭中間位置加多咗兩粒長條形鞋釘，同時，前掌鞋釘形狀，由14代嘅比較尖嘅箭形，改良為15代較鈍嘅箭形，部份鞋釘更換為三角形釘。呢堆改動就係想令更多鞋釘可以踩入草（唔咁易跣），但同時以已改良嘅鞋釘形狀提高轉向嘅可能性（唔咁易食死），減低之前兩代因為箭形釘太咬地而傷腳踝嘅問題。
圖五：Air Zoom
Vapor 15最大特色就係Air Zoom鞋底，將平時平底常見嘅加強緩震概念套用於有釘足球鞋。摸上手同按壓之下，都真係Feel到有一層有一定厚度嘅空氣係鞋底，但要留意嘅就係呢個Air Zoom只係佔鞋底嘅四分之三面積，鞋踭位並沒有包含在內。咁樣諗，Vapor 15定位係速度型同輕身，多做轉向，所以係經常觸地嘅前掌位置放置Air Zoom係非常合理，呢到同平底著重後踭緩震（甚至捨棄前掌緩震）係完全唔同的。
圖五及六：鞋墊及鞋底協同作用
我地估大家買對鞋返屋企除咗洗鞋應該都好少研究鞋墊。鞋墊有咩用？鞋墊係成個防滑系統，甚至係身體協調嘅一大部份。成個系統由鞋底及鞋身 > 鞋墊 > 襪 > 腳板而組成，如果其中一部份表現唔好就好影響場上表現及穿著感，比幾個例子大家諗諗，一：某啲朋友唔著防滑襪就好易會感覺到鞋墊 > 襪呢個部份移位；二：Trusox相對起平價防滑襪，除咗係鞋墊 > 襪部份（即襪嘅外面）係襪 > 腳板部份（即襪嘅入面）都有加防滑膠粒而平價係無後者的；而我地想講嘅就係第三，鞋身 > 鞋墊既部份，留意下Vapor 14嘅鞋墊背面係有特殊坑紋，而係鞋嘅鞋底（見圖六）都有相應坑紋作鎖實鞋墊嘅用途，相反，因Vapor 15要迎合Air Zoom緩震，所以就做唔到呢個設計，以防滑膠條作替代，可以見到呢到係做咗個取捨。
總結：Vapor 15係Mercurial系列嘅一個重大創新里程碑，同時因鞋底（而非鞋型有改變）設計間接令到鞋型闊咗少少，令多少少人可以試到呢對Nike，甚至係足球鞋嘅代表系列。但同時，相對起Vapor 14，Vapor 15會係某啲位置，例如鞋面同鞋墊做左少少取捨。
Nike Zoom Mercurial Vapor XV Elite FG – Barely Green/Total Orange/Ghost Green/Blackened Blue
Nike Zoom Mercurial Vapor XV Elite FG – Barely Green/Total Orange/Ghost Green/Blackened Blue
SKU: DJ4978-343
Nike Zoom Mercurial Vapor XV Elite FG – Black/Summit White/Volt/Dark Smoke Grey
Nike Zoom Mercurial Vapor XV Elite FG – Black/Summit White/Volt/Dark Smoke Grey
SKU: DJ4978-001
