正常嚟講，大部份嘅波砵出品都係源自於自身品牌喺市場上嘅定位同需求，例如過往Nike，Adidas或者Puma都會自行決定嚟緊出咩新配色，個系列叫咩名，同一個系列會用唔同配色發行(Nike Luminous Pack, 2023)，限定喺唔同地區發售(Nike Blast Pack, 2023)，又或者喺得某D系列有頂級牌本，以上種種都相信係品牌嘅決定，而零售商只喺佢哋賣貨嘅其中一種渠道。但近年嚟唔知大家有冇發覺，大牌子同大型零售商嘅關系都越嚟越緊密，就好似過往有限量版波砵只係經某一特定零售商網頁發售(Adidas F50 Remake, 2020)，以零售商冠名同個別大牌子合作推出嘅波砵等等亦都有(Puma X Unisport)。當然，呢啲限量版未必會喺比賽場地上見到，但係憑佢哋別樹一幟嘅設計，都已經令到大小球迷都心醉不已，同時令波砵嘅發展生色不少。其中一個比較出名嘅零售商Pro:Direct Soccer(下稱PDS)，呢個零售商相信一眾有買過波砵嘅波友都有聽過。咁岩，今年就喺佢哋嘅25週年紀念，而佢哋亦有藉此同各大品牌聯乘，推出各種專屬PDS嘅限量版波砵。大家較為熟悉嘅Nike/Adidas/Puma亦都已經公佈咗佢哋/已經係PDS週年紀念將會推出嘅作品。
為PDS 25週年打響頭炮嘅就係Puma Future X Powercat Tokyo。作為原型嘅Puma Powercat “Tokyo”，係以日本東京富有特色嘅霓虹燈景觀作為設計重點。實物嘅風格係當時嚟講亦都係相當之大膽，不論係配色定一或分佈上都采用咗較為卡通嘅設計，鞋底嘅潑墨都有些少日本漫畫嘅既視感。而呢一對繼承咗”Tokyo”配色嘅Puma Future Ultimate，配色同設計上大多數都沿用翻舊有特色，包括鞋面嘅潑墨，設計擺位，日文字等等。唯獨是鞋領，鞋舌同後踭位嘅黑色比例有明顯嘅增長，同鞋面嘅白色造成咗強烈對比。小編推測呢個配搭都同黑白色嘅PDS Logo有關，整體嚟講成對鞋好似仲靚仔咗。作為第一對25週年嘅作品，PDS又點可能唔留番一啲屬於自己嘅足跡？係後踭位，我地甚至可以見到個Signature嘅PDS Logo。
跟住落嚟就會講另一對Limited Edition，全球限量各2500對嘅Mercurial Superfly 9 & Vapor 15 25th Anniversary Edition。喺講呢對鞋有咩特色之前，大家又有冇諗過點解喺Mercurial？點解唔喺Tiempo？係咪貪佢可以賣多兩對？
相信對Mercurial有深入了解嘅都可能會知道今年除咗係PDS創辦25週年之外，亦都係Mercurial 系列嘅25週年。鞋面上見到密密麻麻嘅英文字，其實喺過往25年嚟，Mercurial系列所擁有過嘅名同Logo。呢對銀身藍剔嘅Mercurial係鞋內側亦都特登設計咗一個”MXXV”嘅Logo嚟慶祝第25週年。特別想講嘅係，Superfly版本係沿用咗Superfly 4代經典嘅大剔擺位，而Vapor版本只係將大剔Logo放係鞋側，即係現時Mercurial較常見嘅設計。小編認為呢個決定幾聰明，因為以往嚟講一直都係Vapor賣得比Superfly好，而放返個鞋面大剔出嚟會更吸引人買Superfly，雖然兩對都係一推出幾分鐘就賣晒。一如概往啦，Nike限量版最唔少得嘅就係佢嘅獨立編號，每一對鞋上邊都印有自己嘅Number，全球係得一對咁多，今次就印左喺鞋踭內側附近，不過好彩抽到靚Number嘅自然升值唔少！
呢對Accelerator大家都見唔少，同OG黑紅相比都係一線之差，將腳內外側嘅白色改左做銀色。縱觀咁多對Predator Accelerator Remake嚟講，講到最受歡迎同最有紀念價值，相信紅黑配色都會係毫無爭議。令大家比較驚訝嘅相信係點解明明已經重製過嘅限量版，竟然會重製第二次？
同Nike Mercurial一樣，Predator Accelerator都係出生於1998年，而Prodirect排到去5月2號公佈呢對鞋嘅消息亦都係有深思熟慮過。係1998年，當年為初出茅廬嘅Predator Accelerator代言嘅碧咸，正正係5月2號生日。可以話係PDS面世嘅同一年，就已經有兩個經典嘅系列誕生 — Nike Mercurial & Adidas Predator！今次Accelerator對PDS嘅致敬位就放咗喺鞋墊上邊，一左一右分別係Adidas同PDS嘅Logo，而今次亦只係限量發售998對(都係致敬番1998年)，比起上一次Remake少咗一半 (1998對)！
除咗話各款Crossover大牌子嘅限量版之外，今次25週年其實都有其他商品㗎！就好似PDS同Reusch呢個專門設計龍門手套嘅品牌，合力打造咗一對全新嘅手套。以懷舊嘅白底Design，配翻90年代嘅Reusch Logo，夠哂Signature。冇打開龍門嘅波友可能未必認識，Reusch呢個品牌一路以嚟都有為職業門將提供高質嘅龍門手套。數到本地嘅有傑志門將王振鵬，世界各地嘅亦有熱刺門將洛里斯以及係上年2022年世界盃打入4強嘅克羅地亞門將利華高域。
PDS都有公佈25週年嘅慶祝並唔會因為咁就此結束，陸續有嚟嘅仲會有Pantofola d’Oro Lazzarini及聯乘其他品牌嘅商品，想繼續留意有咩新花款推出就要Mon住我哋嘅最新消息啦！
喺呢幾年入邊，我哋可以見到各大型零售商同第三方係市場上嘅地位同貢獻都有日益增加，佢哋嘅重要性對於各大品牌更加係不言而喻。比較成功嘅例子正正就喺今次舉辦25週年紀念嘅PDS，同各個唔同品牌推出聯乘限量版商品。另一個比較成功嘅例子就好似StockX咁，透過二手平台交易或者轉售波砵都喺對呢個行業有所幫助；銷售嘅渠道變得更加多樣化，而每個渠道都有佢哋嘅優點(例如喺個別限量版/聯乘發佈)。喺Adidas同Puma之後，我哋都可以預見到嚟緊Nike亦會同頂級嘅零售商會有更加緊密嘅合作，包括推出富有不同特色嘅聯乘系列/產品。但呢個情況同時意味住喺可見嘅將來，各大品牌嘅貨源將會更加集中同壟斷，同大型零售商喺市場上嘅關係更加緊密同顯著，透過定價/商品庫存嚟決定合作嘅程度，形成一種更加互惠互利嘅連鎖效應。
雖則咁樣會對我哋呢一種小型零售商帶來嚴重嘅打擊，而波友們亦會因為官方定價提升嘅關係，而要比更多嘅錢嚟買同一款嘅商品。但相信喺不久嘅將來，我哋可以預見嘅係，波砵市場將會帶嚟新嘅衝擊，各大聯乘將會為呢個市場帶嚟唔少新嘅元素。
