平地足球鞋因為係硬地上受力多，所以鞋底緩震就係大家成日講嘅話題。一個又話Streetgato無「緩震」所以唔抵買，一個又話React好過Lunar 30%，一個又話Boost世界第一，而坊間普遍評測都係以第一身角度去比較。所以，今次嘅評測希望以一個較客觀嘅角度，等大家可以更加了解呢項選擇波Boot其中一項最重要嘅考慮因素，但我地始終唔係科學家，所以下面都講咗少少我地嘅頭盔！（題外話，又係一篇有機會會倒米嘅評測！）
今次測試我地運用咗硬度計，數值越低代表物料更淋（硬度較低），同該物料嘅緩震能力掛鉤。數值只作參考！
1. Boost物料最吸震？
數值顯示係今次測試嘅九款鞋中，Boost物料（圖2）硬到係最低，同大家普遍認知嘅係一樣，但非常可惜，Boost底嘅平地足球鞋已經絕跡，由X 19.1 IN嘅後爭Boost底設計之後，Adidas已經漸漸使用Lightstrike（圖3），一種硬度高少少但回彈力較強，而係更加輕嘅一隻物料，所以個取捨我地覺得係合理，因為係讀數上兩者真係差可能10%以內但帶來嘅係更輕身同回彈力更強嘅體驗。
2. Adidas Predator Bounce – 硬度較高？
相對下，幾年前嘅Predator仲係用緊Boost，依家已經用緊一隻叫Bounce嘅物料（圖4）。係測試下，讀數相對上比較高！睇黎Adidas想消費者係呢度做一個取捨，推出市面上唯一一對無鞋帶頂級配置嘅平地波Boot，但送你一但緩震力較低嘅鞋底。
3. Puma未著手應用頂級緩震物料
雖然如上題，但其實Puma Ultra 1.3 Pro Court （圖5）運用嘅普通物料，數值上其實都係同平均差唔多，唔失禮亦無驚喜，掉返轉，我地認為呢樣野都同Puma一直嘅賣點相似，佢地一直嘅優點都係係鞋面上面同鞋頭部份嘅紋理設計。
4. 大家最關注嘅Nike — 不出所料
React ~ Zoom < Lunarlon < Normal 就係個結論！呢度特別講一講因為平底Air Zoom Mercurial主要係以泡棉物料呈現，同頂級版Elite釘款以氣袋方式呈現不同（又或者平底內有氣袋，我地未有資料）；React作為Nike一直推廣嘅緩震皇者，係測試嘅結果係Nike最淋嘅物料陸比Lunarlon數字上更優勝，亦都同Nike一直指出React比Lunarlon更優勝嘅講法不某而合；係低階嘅Tiempo Academy同Streetgato，我地嘅測量結果係兩種物料嘅硬度大致一樣，而係數值上大約係差React/Zoom大約20%-30%左右，但當然，實際出黎嘅效果同我地就咁簡單量度物料硬度會有出入，都係做個參考！
戴少少頭盔，亦都係要大家知道嘅：
1—鞋底整體緩震除取決於物料本身特性之外，鞋墊，鞋底紋理同鞋身構造都有一定影響。
2—以上測試方法有參考同類鞋底硬度測試，但離真正係實驗室做嘅仲有一段距離，所以只作參考！如有物料測試專家，係到都希望請教一下有咩可改正～
3—緩震並非「全部」，有時，過度緩震可能會影響跑動能力，正如你屋企張床都唔可以太淋，要有一定承托，所以有部份鞋底主張嘅唔係吸震，而係回彈能力。
另外，2022就快完，我地都希望比一個小目標，就係每兩星期出一篇深入嘅分析文，都實現返我地嘅初心，其一就係希望大家買得適合，同真係了解你著緊果對波Boot嘅物色，優缺點，甚至係設計理念，歷史等等，好似波衫咁樣，建立同推廣呢種足球鞋嘅文化；其二就係希望可以令大家更關注一下香港足球咁樣啦。前姐可能係好似呢篇咁樣嘅實驗，可能係好似之前嘅頂級版VS低階版比較，後者可能係Boot Watch，甚至可能係去討論足球場供應等等較大嘅話題，希望大家一直支持啦～有意見都可以一齊討論。
