接近萬人網上觀看今日東南海杯嘅決賽，現場人數大家都睇到，氣氛絕對係近年最好之一。越黎越多前職業或現職業球員參加，唔少國腳級球星落場獻技，亦有唔少石地出名嘅老波骨。東南海杯呢項石地盛事越來越受大眾歡迎，但今日想同大家講嘅係，香港呢種獨有嘅七人比賽及七人足球正慢慢被取代。上年，政府推出咗提升足球場五年計劃，同時康文署聯同民政署所委托顧問進行的本港運動設施供應顧問研究，當中亦建議更新香港規劃標準與準則。
前者聽個名好似好正咁樣，但其實內有乾坤。仔細發現，其實呢個所謂嘅提升，有一部份措施可以講話係將「唔合格」嘅七人足球提升至合國際標準嘅五人足球，唔少改建工程就係將現時嘅七人場改建為五人場，接合國際標準咁話（因為七人足球並未受國際認可，而同時，現時部份七人場面積過細）。翻查區議會文件，已經有唔少改建工程正籌劃中，如沙田區嘅源禾路七人足球場將改建成五人，大圍嘅大園足球場將拆除，以河上用咗接近成億起嘅五人足球場代替，中西區亦有干德道配水庫遊樂場及科士街臨時遊樂場進行相同「七轉五」嘅工程。同時，將來係唔少新發展區域，城市規劃亦無預留位置起七人足球場，只係會起五人足球場。
後者，同大家簡單介紹一下。現時標準係每30,000人需提供各一個五人足球場及七人足球場，即大約要提供各250個。咁現時實際起咗幾多？根據2019年數據，現時香港只有74個五人足球場同埋207個七人足球場，十一人場都係差標準一截。首先，呢度已經係見到一個足球場嚴重不足嘅問題。咁，上面講果個更新係啲咩？就係以上嘅顧問建議調低同合併標準，由每30,000人「希望」享有一個五人場及一個七人場，「更新」至每22,100只提供一個五人場。帶出嘅係，顧問建議更新嘅標準會令人均規劃享有嘅足球場數量減少約40%，同時亦會係更偏向五人足球。相同嘅係，十一人場標準亦由每100,000人提供一個下調至每172,000人提供一個。呢度戴個頭盔，以上為顧問向民政署及康文署所提出嘅研究建議，並未確定實行，可參考立法會CB (4)1551/20-21(05)號文件。即使如此，根據現有標準，現時球場數量亦比標準低一截。
係香港，提供足球設施嘅係政府。你會話，點解唔會好似外國咁樣，有好多私人發展嘅足球場？第一，香港法例多，工廈足球場等等全部未能過防火地契規劃等等；第二，地租貴，私人足球場收費被迫調高，大家又接唔接受到？係咁多失敗嘅工廈足球場例子下，仲有無人肯去做？
唔好誤會，呢到唔係話五人足球唔好，五人足球係香港呢個高密集城市下非常適合嘅產物，可以大力發展，同時係可以踢出國際添！五人足球當然要做，但同七人足球兩樣野唔係相對，而同時，調低足球場供應標準絕對係對香港足球發展嘅一個大錯，炒場情況只會越來越普遍，越黎越多人爭場踢，無限跟隊數量，甚至影響唔少嘅足球訓練課程。政府又會唔會考慮到呢，咁樣係咪推動緊足球呢？
