(Photo Credit: HKFA)
星期一香港喺大球場友賽泰國，雖然對陣高一班嘅球隊，但下半場（特別係尾段）嘅攻勢都非常入肉，希望港隊再接再勵！對上一次做香港隊 Bootwatch 已經係一年前嘅亞洲杯外圍賽，今次返黎熟悉但即將消失嘅香港大球場，喺度為大家介紹一下港隊球員場上嘅戰靴。
一張憙延 | Adidas F50 Remake
迎來 Debut，尾段多次製造威脅嘅張憙延除咗場上表現亮眼之外，戰靴都相當亮眼。2021年尾推出嘅 Adidas Legends Pack，重製咗 Predator Pulse、Adipure 同埋 F50 Adizero 呢幾款經典嘅Adidas 系列，黑金嘅配色亦係 F50 嘅一隻經典配色。作為 Adidas 嘅速度系列，F50輕薄嘅鞋面同碳纖鞋底設計可以提升加速度，希望下場可以睇多啲！
一勞烈斯 & 黃威 I Nike Mercurial Vapor 15
喺中超打滾嘅後防大將勞烈斯揀咗 Blast Pack 配色，而理文中場大將黄威則揀咗搶眼嘅 Luminous Pack 配色，兩隻都係 2023 最新推出，非常搶眼。Vapor 15 系列主要設計理念係輕身同速度感，箭形鞋釘有助提升轉向反應及加速度。
一胡晉銘＆余煒廉 | Predator Accuracy.1 / Copa Pure.1
喺下半場入替嘅兩位穿着 Adidas 2023 最新推出嘅 Heatspawn 配色，胡晉銘嘅 Predator 系列係 Adidas 最成功嘅一個系列，現時仍然有唔少 Fans 追隨，而今代 Predator Accuracy 鞋面亦比上一代作出重大改良，更適合中場球員；余煒廉嘅 Copa Pure.1 唔係前幾代一直沿用嘅袋鼠皮，而係經柔化嘅牛皮，雖然係牛皮，但經過處理之後鞋面質感絕對有得同袋鼠皮比。
