（講明先，成篇野都係諗到乜就打乜，全無重點可言，睇完就算，有錯請指證）
踢開波既朋友，買波砵時都應該會有個問題：夠竟呢對砵有咩好？明明呢兩對個樣差唔多但係點解貴咁多？我著果對同美斯著果對有無分別？等等。
呢堆問題既出現，全因波砵存在唔同既「版本」。
一直以黎，香港波友都會對呢堆同系列但唔同Model既波砵區分為唔同既「版」，系列最貴果對就叫貴版，最平就叫平版，定價低過貴版又高過平版果對就叫中價版。
隨住波砵越黎越進步，各大製造商為左吸納唔同客源，同時為左貼合唔同用家需要，波砵就越出越多版。比個例子大家：
Nike既招牌Mercurial系列第12代，現時係存有4個Model： Elite, Pro, Academy, Club
*用左香港人最鐘意既Prodirect既圖，係到credit返
Tiempo第6代，有5個添： Legend, Legacy, Mystic, Genio, Rio
Adidas既Model Naming就較為簡單，而Predator就有5個Model： 18+, 18.1, 18.2, 18.3, 18.4
首先要講講既係，點解會分左幾個Model？點解個定價會唔同？
Case Study 1: Nike Tiempo 以Tiempo呢個追求球感既系列，腳面用料同鞋型定型至為重要。波砵界用既天然皮面，不外乎以下幾種：袋鼠皮(最柔軟，張力最好)，小牛皮，牛皮，膠皮等等(而Tiempo既Rio會用合成假皮)。由於唔同皮質對球感有極大影響(如伸展性，厚度，柔軟度等等)，加上用唔同材質製鞋既金錢成本，時間同工序等等，以唔同用料做既波砵就會有高低之分，亦因此會出現唔同定價(之後會再解釋)。
加上唔同既波砵科技(e.g. Nike既ACC, Nike Grip等等)多數都會配搭係較貴既Model上，唔同Model既定位同分野就會更明顯。 可以睇返第二張圖，上面既5個版本分別係用左唔同既物料，由袋鼠皮，到小牛皮，到合成皮；由有ACC(All Conditions Control，一種Nike鞋面處理技術令波砵發揮唔受天然影響)，到無ACC。
—————分隔線—————
講到呢到，希望大家都會明白唔同既系列係會有唔同既Model。之後去返主題，咁夠竟呢堆唔同既Model有無等級之分？我地又唔可以調返轉諗：如果兩對波砵既定價唔同，我地可唔可以話貴啲果對高級過平啲果對？
Case Study 2: Adidas Nemeziz 17 Nemeziz既第一代係2017年推出，由美斯代言，係一對主打靈活既波砵，大底，鞋面等等既設計都係為左加強轉向速度同保持協調。推出果陣，佢就有以下5個Model: 17+ (定價£280，鞋面無鞋帶設計)，17.1 (定價£220)，17.2 (定價£130)，17.3 (定價£80)，17.4 (定價£50)。
睇落，17+定價係最貴，咁應該係代表佢既用料，技術等等係Nemeziz最頂尖既一個Model？事實並非如此。代言呢個系列既美斯，佢著既Model係Nemeziz 17.1。17+同埋17.1定價相差果60鎊，其實就係由17.1拎走鞋帶，加長Agility Bandage既設計及用料費用(當然仲有無鞋帶呢個理念既設計成本)。
Case Study 3: Nike Mercurial 11代 (2017) 2017年既Mercurial 11代有5個Model: Superfly, Vapor, Veloce, Victory, Vortex，而當中有高筒既Model會加上”DF”字樣，如高筒Veloce會叫做Veloce DF，定價亦都會較高。
呢度想講既一樣野係，既然美斯都著17.1 (依家就18.1啦)，尼馬都著Vapor (依家就叫Vapor Elite啦)，其實呢堆Model理論上都應該被視為各自系列最高級別既Model。
想表達既係即使可能Nemeziz 17+同17.1設計定價有分別(Vapor vs Superfly同樣道理)，佢地都係屬於該系列入面最高級別既版本。
—————分隔線—————
但係，今年二月又發生左一件比較難搞既事，Nike將佢地唔同系列本身獨有既Model名統一晒做以下4個：Elite, Pro, Academy同埋Club以表達唔同既等級。以Tiempo做例子，Tiempo既 最頂級Model Tiempo Legend將會改名成為Tiempo Legend Elite，
而次頂級Model Tiempo Legacy就會改成Tiempo Legend Pro。
Magista既 最頂級Model Magista Obra(高筒版)同Magista Opus(低筒版)
就會改名成為 Magista Obra DF Elite同埋Magista Obra Elite，
而次頂級既Magista Orden就會改成Magista Obra Pro。
成件事睇，其實呢個轉變，個人認為係一個好大既進步，因為以前Nike既唔同系列既Model名都唔同，唔熟波砵既波友，可能就會問其實Tiempo Legacy既定位係咪會同Mercurial Victory差唔多既，呢類既問題？依家有左統稱，唔同系列唔同Model既波砵就可以更易作出比較。
—————分隔線—————
但係，有樣野想講既就係Nike既平底。
心水清既朋友會清楚以前Nike既平底黎黎去去都係果幾款，但自從2014年出左高筒砵，出Magista同埋開始搞FootballX之後，平地砵就有左改變。果陣時高筒只會有一個版本，就係Proximo (或者Elastico Superfly) (2017年有開始出Academy(第三級)Level既高筒平地)。低筒平地就出左幾個特級，而最高級別係Finale(承接Elastico Finale既命名)。
所以，Mercurial，Hypervenom同Magista會有Proximo同Finale兩個頂級版本，一高一低咁樣。咁Tiempo就無高筒啦，果陣既Tiempo第6代就已以下幾個Model黎命名：
Proximo (袋鼠皮Lunar底) > Mystic (牛皮) > Genio (牛皮) > Rio (合成皮)，留意果陣返係無Tiempo Finale。
但係上年第三季第四季左右 (Tiempo第7代發行果陣)就開始傳Tiempo Proximo呢對神鞋將會停產，由牛皮+Lunar底既Tiempo Finale取代。而事實上，Tiempo第7代推出既Lock In Let Loose Pack又真係無Tiempo Proximo既推出。(無錯呀你Search Tiempo Proximo II係會有Lock In Let Loose配色既實物圖，但實情係佢無推出過)
但係係第7代Fire & Ice Pack果陣，Nike罕有地將Tiempo Proximo同Tiempo Finale同時推出。好喇問題黎啦，上一段講到話其實Finale呢個Model命名係屬於低筒貴價版既，而Proximo就係屬於高筒貴價版既，Nike究竟做緊D咩呢？？
Fire & Ice Pack，Nike出既3對Tiempo平底
理性D咁睇，如果有Proximo Finale 同 Ligera 三個選擇，當然就係Proximo係頂級版本啦，但咁樣既話你又擺對Finale出黎好混亂囉，不如你改左Finale個名仲好啦。BTW，呢對Tiempo Proximo 2係唯一一對Nike出過既Tiempo
—————分隔線—————
仲有樣野想講既係，一直以黎香港波友都用貴版中價版平版呢三個俗稱黎命名唔同既Model，但係一直想講既係根本呢堆俗稱係無用(雖然我仲用緊)，甚至會混淆視聽。
係網上訂砵呢樣野仲未普及既時候，香港返開既最平價波砵版本，多數都係現時屬Academy級(e.g. Mercurial Victory, Tiempo Genio等等)，當然都有Club級(e.g. Mercurial Vortex, Tiempo Rio等等)。普遍地，波友都會將佢地叫做平版，因為係果陣呢堆砵400幾蚊就有交易，係屬於最平價既選擇。
但隨住Academy版既價錢由479一路升升升升到599(Mercurial Victory)，629(Mercurial Victory DF)或699 (Predator 18.3 IN)等等，NIKE同ADIDAS為左唔好比大眾一個係咁加價既感覺，佢地就開始推出越黎越多既Club級 (adidas就係18.4)既波砵(e.g. Tiempo Rio等等)，而呢D次一級既砵既定價當然係比Academy級平啦(Tiempo Rio, Hypervenom Phade香港賣429)，所以總括黎講最平既砵既價錢就好似無咩點變動，但其實個級數係跌左囉。
所以最近見到有唔少人都叫Academy做中價版果陣都幾搞笑。嚴格黎講佢又真係唔係屬於最平價既平底既喎，但同普遍既認知(平版=Academy版，出街400 500買到果款)又有分別。同時，比如Superfly平底係有出Elite Version架喎，但係Vapor平底最高都只係有出Pro，咁唔通我又叫Vapor Pro做中價版？咁最貴果隻係邊呢？
—————分隔線—————
但其實都係果句，你叫咩版咩版只係一種俗稱，但自己最唔想見到既係雞同鴨講既情況有出現。最緊要係了解唔同系列有出邊幾隻Model，咁先知道每一個系列，你可以有咩級數既選擇。
好啦其實只係一個好小既問題，但自己最唔希望既係波友比呢D小問題影響左自己揀一對最適合自己Budget既波砵，所以希望可以係呢到將少少既知識分享比大家，等大家買砵果陣都可以更清楚，更了解。
