相信唔少人買到一對稱心滿意嘅波砵都會十分珍識，但係就冇保養波砵方面嘅知識。保養方式同波砵嘅壽命息息相關。如處理不善，存有異味，鞋身變形，破損等等嘅情況就會較容易發生。但如果其保養方法妥善，不但只波砵嘅壽命會延長，物料嘅質素亦唔會因使用次數愈嚟愈多而降低，咁就可以大大降低咗一系列嘅問題啦！!所以Bootmeister今次就會同大家由鞋底同皮面分類講吓唔同波砵喺清潔同保養方面要注意嘅地方。
A. 鞋底分類
石/草地嘅波砵保養都會有唔同。每次波砵用完之後，都要做基本嘅清潔護理。
- 仿/真草地: 一般步驟都喺先將鞋內部/鞋底積存嘅砂土/膠粒除去；鞋面部分可以用軟毛刷；鞋底部分則可以使用硬毛/金屬刷(香港某啲球場會有提供)，用水去除。之後再用濕布將骯髒部分擦走。清潔完之後就放置於陰涼通風嘅位置。
- 石地: 只需要用濕布將骯髒部分擦走，清潔完之後就放置於陰涼通風嘅位置。
雖然基本保養喺重要，但係Bootmeister都明白唔喺踢完波每次都願意/有心力會做好哩門功夫。所以我哋再列出保養唔同類型波砵嘅重點，就算唔做基本保養，做好下列各項，波砵都唔會過快報銷。
B. 皮面分類
1. 真皮類
- 沖洗︰用柔軟嘅抹布配合溫水清洗，切忌使用硬毛刷或任何表面粗糙嘅物料。
- 晾曬︰先喺鞋入面放一團報紙/茶包，作吸濕同辟臭嘅用途。再放波砵喺乾燥嘅地方直至完全乾身。
- 保養皮革︰喺鞋面上打上一層鞋油，再用軟毛刷輕輕推開，掃平。
- 保持鞋型︰存放波砵嘅時侯使用鞋撑(可用紙團/硬紙板代替)，皮革就會保持挺身。
禁止/避免事項
- 避免用洗衣機洗鞋或將成對鞋浸落水，因為天然皮革浸水後都會出現顏色剝落、鬆散、老化的狀況。
- 避免放在太陽直射處曝曬。否則會造成鞋面乾透但鞋籠依然濕透嘅情況，真皮就會容易裂開。
2. 合成材料/類
- 沖洗︰用冷水洗滌，無須配合指定清潔用具，可用海綿加上清潔劑擦走污積。
- 晾曬︰放波砵喺乾燥嘅地方直至完全乾身。
禁止/避免事項︰
- 避免使用含有溶解物的護理品，如鞋油，因為呢啲化學物會破壞合成皮表層。
- 同樣避免放在太陽直射處曝曬，並避免放在暖爐旁。
