呢篇文帶大家好簡單咁認識一下真正既「球員版」波砵，無咩Takeaway，純粹比大家認識多少少波砵既世界！
最近波砵款式越出越多，搭配既技術越黎越先進(有無用係其次)，仲有越黎越多既等級之分，令人眼花繚亂。特別係近年各大廠不斷Restructure佢地既Silo同埋Model吸引更多同埋更廣泛既客源，因此必需清楚了解一下依家波砵Model既架構。我地賣開波砵，成日聽到人講既就係：
落場版同貴版有咩分別呀？(我聽完都唔知點答，夠竟你指既係？？)
想要MERCURIALACC！(依家Nike既Pro Version (次於頂級Level) 都已經有ACC啦)
要對平版唔該！(19.3定19.4?我賣對19.4比你既話 你會唔會話點解同出面Adidas賣果d唔同既 你係咪賣假貨咁樣)
首先啦我地係極唔推薦用呢D Term黎identify一對波砵，(正如之前既文章都講到)因為你係無可能為佢地下一個定義，而且呢啲定義係唔準確，所以，想玩波砵玩深入啲，我地絕對建議大家捨棄呢啲Term，直接以Model名黎分別佢地，咁就唔使雞同鴨講啦！
有玩波衫既朋友會知道，波衫既話除左有普通既球迷版，仲有球員版，而球員版又會再分商業市售版，同埋更衣室版(洗水TAG同印字Size 等等有分別)。其實，對波砵黎講，呢個Classification都係通用架！
市售Elite Version vs 球員著用EliteVersion
係大部份既情況下，大家買到既頂級Level波砵同踢緊英超西甲等等球星著緊既都係一樣既；但係當然唔係位位球星都搵到佢地最舒服既砵啦，特別係當一D更出名既球星可能要背負住一堆商業責任，好似尼馬幾年前就要擔當Hypervenom既代言，就算本人唔鐘意Hypervenom既表現佢都要監硬著既時候，各大波砵廠就會出一啲球員定制 – 真正既球員/落場專用版！
波產意產德產
對波砵認識多少少既朋友可能會聽過波產(i.e. 波斯尼亞產)既波砵，呢啲砵呢就係手工好啲，整黎專係比球員穿著既版本，但其實唔一定所有波產意產砵都係比球員著，好多時都係會因為工期，設計，保密性(越南佬中國佬係0)等等而選擇工廠，所以有時就會有市售意產波產既出現 (e.g. PHANTOM VENOM FULLY CHARGED)。
要再進一步CLASSIFY佢地既話，大家可以睇睇對砵既TAG上面有無一堆數字9，如果有既話，呢對砵就係整比球員的(只不過拎左出黎賣)。而再進一步既呢就係意產類，意大利有Nike Athletic Service既工廠，專係處理一D特別要求既球員版波砵 (Adidas就係德國)。
以下Show一堆example比大家！
Martial既Fire& Ice Vapor11裡面係補左個CARBON FIBRE版的
BernardoSilva既德產Nemeziz 18+ Initiator Pack
我拎住既呢對Vapor 12 Raised on Concrete SG係無Anti-Clog底既「球員落場版」，果陣Nike既市售SG都係一定會有Anti-Clog底
一串999999就姐係你中獎啦，係真正既球員版
RaheemSterling EURO2016著既配色(無記錯Kyle Walker同一場都係著同一配色)，無公開發售既配色黎架！
Messi一向既開鞋舌版Nemeziz 18.1都係德國生產
KyleWalker除左鐘意剪襪同埋剪波砵後爭位之外，今次將Phantom Venom既鞋面彈性Layer cut埋!
NIKE世界杯波砵既小故事
世界杯果陣，NIKE就推出左佢地既世界杯配色 JUST DO IT，當中各個系列都係以白色作為主色，配搭紅、橙、藍、綠四隻搶眼色，加埋鞋底既電鍍處理，實在清空左唔少人既荷包 (包括我) 。為左隆重其事，大剔牌亦都有係鞋踭 ，鞋盒同埋鞋袋上搞搞花臣。
鞋踭相信大家應該都留意到啦，就係NIKE係今次世界杯JUST DO IT既配色開始，係每個系列波砵既鞋踭都預留左一個三角形，可以比球員印制佢地國家既國旗上去。同平時NIKE幫球員整既鞋領印字唔同，呢種三角形國旗帶有厚度同埋金屬質感，第一次睇實物果陣真係嘩嘩聲：
地緣政治既足球界代表
遺憾既係，關係唔夠勁，搞唔到少量稀有國家既三角國旗版返黎！以下Show一下中國一位波砵老細既Modric Vapor 12 World Cup Edition：
鞋袋方面，NIKE以唔同國家既語言，拼接成一個以” 足球” 而制成既印花，配合埋每個系列既獨有顏色，成為一個非常有特色，MATCH到世界杯主題又好睇既鞋袋：
鞋盒方面採用左同鞋袋差唔多既設計，對比起一段NIKE既橙盒，呢種設計簡直係令人眼前一亮：
講到鞋盒，其實Nike既鞋盒都可以區分到球員版同埋一般市售版架！特別係世界杯果陣，NIKE一般市售版供不應求，而同時又整左好多對球員專用版出黎，所以就會有一堆用橙盒既(球員著既唔會比靚盒佢地) JUST DO IT配色流出左市面！
一般配送比球員既都係用呢隻橙盒架炸！
小結
要玩波砵既話係絕對唔會簡單過波衫，除左一對一對既NUMBERED限量版之外，仲有一堆既MATCH ISSUED/MATCH WORN波砵比各位收藏家去挑戰！但當然，呢堆非市售球員版波砵係咪真係好著好多呢就見人見智，但無可否認既係從呢對特製球員版波砵，當中都會見到唔少職業球員對現有波砵設計既反映同不滿，比如話唔少既個人定制，碳纖版增強加速回彈力及硬度，CUT鞋筒，無鞋帶VAPOR等等。希望將來既波砵，經過呢D COMMENT之後，可以作出更大既改進啦！
