又係呢個貴價版平價版對比嘅系列喇！今次簡單分析一下平價 Predator Edge.3 IN vs 現時唯一無鞋帶貴價平地 Predator Edge.1 IN 有咩分別，廢話少講：
圖二&圖三：鞋面拉西膠有明顯分別
Predator Edge 係 Adidas 角度黎講係一對主要賣情懷嘅波Boot，係之前嘅Mutator系列中發覺拉西膠整一半唔整一半反應唔好，今代就直接放棄係鞋面設計嘅創新，直接用返仿LZ年代吁條磨擦條紋（即俗稱拉西膠），係平底Edge.1 都有配備呢個設計元素，相反，Edge.3 版相對上只係塗咗一層比較厚嘅塗層作相同效果。一直都有証據証實鞋面磨擦系數會大幅度影響控球同傳球質素，而呢到我地見到嘅係一個好明顯嘅效能分別。
圖四&圖五：鞋領位置為另一分野
Edge.1 運用返頂級版本常見嘅彈性鞋領物料及一體成型構造，但鞋領比較長，相信唔係隻隻腳都著得舒服。相反，Edge.3 嘅設計就好似完全反其道而行咁樣，可以見到織布物料預留咗好多好多空位，多到布料位置有折痕，咁，點解唔整返普通分離式鞋領呢？
圖六、圖七&圖八：鞋底緩震運用相同物料；設計都係
同 Nike 設計不同，Edge.1 同 Edge.3 竟然係運用同一種「緩震」底，點解驚訝係因為係之前嘅 Adidas 系列，平價版同貴價版點都會有一定分別，好似 Boost vs 無Boost 咁樣；點解加個引號係因為可以留意下我地上個星期出嘅「緩震物料大對決！」，因為呢款物料係柔軟度上面係甚至比 Nike 嘅 平價版本波 Boot 緩震，例如 Streetgato 同 Tiempo Legend 9 Academy 都係差少少，但都有機會係呢款物料嘅回彈力同支撐會比柔軟度表現更好，呢樣真係唔能夠靠現時簡陋嘅客觀評測去量度啦。鞋底嘅紋理睇到除咗顏色之外，都係一樣，相信防滑能力都係一樣。
總結：比較出奇嘅係 Adidas 係 Predator Edge 系列無係貴版同平版緩震上作出唔同嘅選擇，但見到鞋面同鞋領上都有相當大嘅分別。但，就喺其他貴價版平底 （甚至 Puma Future Z 1.4 / Ultra 1.3）見唔到嘅，而 Predator Edge.1 IN 見到嘅就係平底 Edge.1 同 釘底 Edge.1 鞋面都係運用相同物料同設計，要知道好似 Future Z 1.4 Pro Court 同 FG/AG 咁樣雖然都係 1.4 但係 1.4 FG/AG 隻鞋面係明顯好過 1.4 Pro Court。
