曼聯左翼Marcus Rashford (拉舒福特) 近期推出咗一對以佢為名嘅Nike Collection — Mercurial Superfly ‘Marcus Rashford’。你以為呢對係曼聯球員第一對嘅Signature Edition？並非。最近，喺曼聯3-3加拉塔沙雷嘅歐聯比賽中，同晚有人發現曼聯左翼Jadon Sancho (辛祖) 出席咗公開活動。其實呢位畀人送咗入雪櫃嘅昔日超新星，比起拉舒福特早早已經有Signature Edition推出。
黎到曼聯之前嘅辛祖當然犀利啦，喺多蒙特嗰陣，組織、入攝、突破同射門樣樣都有。19/20嘅德甲，Jadon Sancho用出眾同全面嘅表現為多蒙特創造咗個頗為成功嘅球季。當年只有20歲嘅佢以驚豔嘅表現令Nike為佢出咗第一對專屬嘅Nike SE11 Sancho Collection，即使麥巴比同C朗喺同一個年紀都未有呢個待遇。而以辛祖嘅成長經歷為設計藍本嘅SE11 Sancho 亦喺2020年正式面世。
SE11 Sancho無論喺鞋側嘅 ‘MEGZ’ 嘅浮雕，或者喺鞋底嘅“ NO BALL GAMES ”標誌，都係以英國倫敦肯寧頓附近嘅街道特色做切入點。鞋上反覆印有 “Sancho Sauce” 同 “Vibez” 嘅字，代表辛祖自己對足球風格嘅睇法。而鞋帶上嘅Blue Park同鞋舌上寫住嘅 “#SE11 4 J@DON” 更象徵着辛祖同肯寧頓呢個地區嘅聯繫，希望即使喺全球舞台上大放異彩嘅同時（唔知仲有冇機會），都永遠唔會忘記喺呢個地區陪佢成長過嘅人。
再配返稱得上近代Mercurial系列最佳嘅Superfly 7，Flyknit鞋面不但比後幾代更軟熟之外，鞋型上亦相對修腳，著落帶到舒適感畀球員。成個設計出到黎配咩色都咁好睇，當年亦出過唔少特別嘅限量版㗎！
