2017年嘅球季完咗之後，C朗拿度成功贏得佢嘅第5座金球獎，同當時嘅美斯並列係金球獎得獎最多嘅第一位。作為 Nike 最有代表性嘅代言人，又點少得一對為呢位5屆金球獎得主而設嘅Special Edition呢？
無論你鍾唔鍾意C朗都好，佢都係其中一個最偉大同值得尊重嘅足球員之一。即使佢而家已經接近 40 歲，無辦法再好似之前咁交出咁頂級嘅表現，但你都無得唔佩服佢拎咗5個金球獎呢個壯舉。即使我哋而家睇返呢個其實係佢最後一次拎嘅金球獎，諗住新一代都有唔少人才輩出，但夏蘭特同麥巴比兩位超新星暫時係一個金球獎都未有。
Nike 為咗呢個對於足球員黎講全年度最重要嘅獎項，特別設計咗呢一對 Merucial Superfly CR7 ‘Quinto Triunfo’ 比佢。 呢對金色嘅 ‘Quinto Triunfo’ 係鞋面已經印咗C朗曾經拎過金球獎嘅年份，包括第一次以曼聯球員拎到金球獎嘅2008年，以及隨後喺皇馬拎到嘅4屆金球獎 ’2013’、’2014’、’2016’同’2017’。腳踭位除咗有專屬嘅CR7 Logo之外，亦有 ‘Quinto Triunfo’ (西班牙文中所指嘅第五次獲勝) 嘅印字以及由1到1000嘅限量版編號。
冇人知道C朗仲可以踢到幾耐，而過往為佢而出嘅限量版真係多不勝數，唔知係佢退役嘅嗰一日，Nike又會唔會為佢出最後一對限量版，去紀念佢偉大嘅足球生涯呢？
