唔知各位波友有冇印象，想當年Vapor 13嘅時代，有個特別嘅Pack每年都會出一次，完完全全咁顛覆系列嘅原有設定！
講緊嘅呢個Pack就係Tech Craft啦～有別於以往用開嘅合成物料，Tech Craft幫你將成對都換曬做袋鼠皮，等平時著開輕盈Mercurial系列嘅波友都可以體驗到頂級嘅舒適感！喺Vapor 13年代曾經出過兩對，一對係一體式鞋舌設計，另一對就係分離式，14以及15嘅時候冇出，而黎緊都唔見得會有（因為Nike已經宣佈黎緊將會放棄袋鼠皮做物料）。
當然呢個出發點係好嘅，速度型袋鼠皮，有噱頭之餘亦有實際用途，理論上應該好吸引先係？但實際上嘅反應就話我哋知，兩樣溝埋未必係1+1=2。即使係靚嘅袋鼠皮都有一定重量，而呢個轉變正正拎走咗Mercurial最獨特嘅優點 — 輕盈！平時以輕盈嘅合成鞋面加窄身嘅鞋型，包實腳型梗係唔太大負荷～但變咗做袋鼠皮嘅時候反而兩邊不討好，袋鼠皮Fans會嫌佢太薄太輕，著開Mercurial嘅又唔太接受到皮質波砵，或者呢個就係之後取消咗Tech Craft Pack嘅原因，相信將來都唔會再有咁嘅配搭出現。
