繼續係袋鼠皮波砵！要數到過往出色嘅袋鼠皮波砵，Puma嘅Evotouch Pro FG絕對係比較冷門。值得一提，鞋面由超大面積嘅袋鼠皮所覆蓋，加上選用咗只有0.9mm厚度嘅皮面，皮面上無多餘嘅設計（同期係多坑紋設計嘅Tiempo 6／Tiempo 7），令到球員體驗到舒適感嘅同時亦帶來極之出色嘅觸球感。但當然咁嘅厚度換黎嘅另一面就喺鞋面嘅保護性能唔夠勁，鞋面會較其他鞋款更快「塌」（嗰排，唔同鞋廠先開始研發及改良袋鼠皮越著越「塌」嘅問題，例如Tiempo 7嘅Support Cage）。
針織嘅高筒設計加上袋鼠皮鞋面，相信喺2016年都係絕無僅有！Puma仲特登減少鞋面嘅車線，盡量減低滲水而產生嘅問題，增強返袋鼠皮鞋面嘅壽命。另外針織嘅鞋領位相當有彈性，著鞋嗰陣可以輕鬆套入之餘，內籠仲有GripTex加強磨擦，將腳掌固定喺理想位置。
鞋釘方面用咗圓釘，基本上咩草場都適用。鞋底中間用咗Puma獨有嘅SpeedTrack技術，加強鞋底中軸嘅穩定性，令萬用性高嘅圓釘亦可以擁有唔錯嘅抓地能力。
好記得有一排做緊呢對鞋嘅超特價：(1) HKD699有交易，可以買到呢對 (2) 大面積袋鼠皮 (3) 鞋面唔搞花臣 (4) 有圓釘嘅Dream Boot，絕對係幾年之後嘅今日想像唔到的。黎到今日，鞋廠嘅定價已經越嚟越高，同等質素及物料。技術含量嘅已經唔會再係球場上出現（諗下Premier 3、Morelia Neo、Tiempo 9、Copa Pure等等滿唔滿足到以上四個條件）。
