喺Adidas歷代X系列之中，X 16+ Purechaos都係其中一對值得留意嘅波砵。作為F50 Adizero嘅接班人（2015年嘅X系列有少少慘不忍睹），鞋面都已經睇得出大家嘅分別。F50 Adizero薄過紙咁就當然係快啦，不過比人踩一腳嘅後果都相當嚴重，話隻腳直接比鞋釘輾過都不為過。喺新系列上，Adidas亦都唔希望偏離X系列嘅宗旨 — 速度感，所以X 16+ Purechaos即使眼見有兩層，著落都唔會有厚重嘅感覺。
兩層嘅設計就為X增添咗新元素，呢個名為Purecut Sock System嘅隱藏式鞋帶於當時嚟講依然係相當新穎，亦未有今時今日咁普及。而為咗保証purechaos可以帶嚟媲美F50嘅赤足感，用咗Techfit紡織物作為鞋面物料，令球員可以好似著襪咁緊貼波砵，實物著落都可以感覺到前掌移動嘅自由度非常大，腳內側都非常貼腳而無緊箍嘅感覺。
鞋面嘅一間間條紋就係用咗名為Non-Stop-Grip嘅熱熔膠，加上面頭嘅凹凸紋理去提供返一定摩擦力。鞋底方面都用到着重於柔軟度、輕量同耐用性能出色嘅Sprintframe鞋底，鞋釘方面就有些少改變，大部份釘型較為接近AG圓釘，亦有保留到而家嘅前腳掌開口設計，令球員加速嘅時候更為容易發力。其實過咗幾年之後，Adidas Glitch系列嘅設計、Concept上都同Purechaos相當似，唔知著過兩對嘅波友又點樣評價佢哋呢？
