Phantom系列斷斷續續都出咗好多代，由備受好評嘅Phantom Venom到表現一直唔穩定嘅VSN年代，評價可以話係愈嚟愈差，甚至乎Nike嘅Promotion都係草草了事，球星都不斷由Phantom系列轉投Mercurial系列。黎到GX呢一代就有重大改變，不單止吸引咗好多人轉會，無論係本地定抑或歐洲賽場上邊，都見到愈嚟愈多人著GX，銷量甚至比Mercurial更加好。究竟係邊方面令到GX一躍成為各位球員嘅新寵兒呢？
圖一：鞋面
Mercurial用咗Vaporposite都已經唔係咩秘密，加上鞋面都算柔軟嘅合成物料，貼合感可以話係咁多對Elite波砵之中最頂尖。相比起Mercurial，GX更加落重功夫喺鞋面上邊。除咗以非常薄身而有彈性嘅Gripknit面取代用開嘅Flyknit面之外，亦都運用咗Microtexture嘅原理令鞋面吸啜力比其他系列更加優勝。因此，呢種好似一塊布嘅鞋面摸上手比Mercurial嘅Vaporposite網格結構喺感覺上及實際上都更加柔軟，可以多角度摺合及拉扯。
圖二：鞋面觸感
喺鞋面觸感上，無論係Flyknit定係Gripknit，兩個厚度都相當薄，令到赤足感進一步加強。雖則鞋面相對上感覺較為粗糙，但觸球感上都會係GX更勝一籌，薄身加上Gripknit嘅自然吸啜感覺，令到個波點黎都可以輕易掌控。Mercurial其實都有一定嘅摩擦感，但摩擦感係由鞋面網格而產生，唔係GX咁樣由紋理產成嘅感覺。
圖三：鞋身
Mercurial作為一對專為速度型球員而設嘅波砵，著落去之後有種lock實咗嘅感覺，唔係太多空位可以走棧，而且鞋型好筆直，所以點解成日比人話佢窄身，雖然近期都已經越黎越闊。但正正係Speedcage呢個技術令對鞋可以鎖實腳掌，反應更加靈敏之餘，喺轉向急停嘅時候亦能夠提供足夠嘅支撐。GX就明顯睇得出鞋型較為闊身，而且前腳掌可以擴展嘅範圍都相對大，設計上更加接近腳掌嘅曲線。穿著感上，可以見到Gripknit鞋面範圍比例極高，腳內檔位置保留Phantom系列一直以黎嘅大面積空位，變相腳面及內檔範圍會十分貼腳，著落去同著襪冇乜分別，仲有少少彈性做緩衝位。
圖四：鞋領
Mercurial喺12代之後就一直保留住一體式嘅鞋舌，分別唔太大。而GX亦有沿用翻舊時Phantom系列嘅斜向鞋帶加Ghost鞋帶技術（隱藏式鞋帶），令到鞋面有更多空間去接觸個波，呢個設計相信每一個球員都會好歡迎！
圖五：鞋底
鞋底嘅Air Zoom底都係Mercurial做得出色嘅地方，每一下踩落去都提供到回彈嘅感覺之外，佢個強度亦都好堅韌，提高咗個安全性，對速度型波砵嚟講呢個功能超級實用！而GX個底採用咗比較萬用嘅人字釘，保留一定抓地力之餘同時提升轉向嘅速度，唯一缺點係中前方鞋底冇咁實淨，仲軟到可以輕易屈埋。
總結：兩個系列嘅分別其實都相當大，鍾情於速度感同鎖緊腳掌嗰隻包裹感嘅當然Mercurial會更加啱你心水！而要求更優秀嘅鞋面摩擦力同轉向功能，咁就非Phantom GX莫屬。其實最好嘅波砵永遠都係因人而異，搵得出最適合你嘅波砵先係最主要！一齊留意吓下季Nike會有啲咩新改進啦！
