Tiempo 10即將推出啦，喺呢度等小編同大家溫故知新，講一講Tiempo第9代嘅特點之餘，都update返大家黎緊新一代Tiempo有咩新特色！
圖二：鞋面
當鞋面由袋鼠皮變成合成皮，觸感上有明顯分別都相當正常。大部份袋鼠皮摸落都會好軟熟，淋到好似牛油咁溶化，用手指壓落去嘅時候會好易咁凹左入去，而附近嘅鞋面紋理係不規則。T10嘅鞋面主要物料都以合成皮為主，雖然摸落都係淋身，不過同袋鼠皮都仲有一定距離。簡單咁比喻一下，T9係一張坐咗好耐嘅梳化，而T10就係一張新嘅梳化，耐用程度理應會係T10較為優勝，不過實際表現就落場先知！
圖三：鞋面紋理
T9美其名曰就叫反樸歸真，盡量減少一啲用途不大嘅功能。但實際啲講佢鞋面設計真心唔算多，連以往常見嘅袋鼠皮車線都冇埋，淨係加咗海棉同鞋面嘅少少凹凸紋，整體上都比以往輕盈同舒服。而T10就連海棉都拎走埋，等球員可以更近距離同個波接觸到。Nike同時喺新一代加上Flytouch呢個技術，鞋面亦有一條條坑紋(官方暫時未有公佈相關詳情)。但睇返以往同類型設計，相信都係為鞋面提供吸震，加強物料以外嘅整體柔韌性 (鞋身更易屈曲)，令鞋同個波嘅接觸面更大。究竟會唔會有驚喜？咁就要等官方再update大家啦👀
圖四：鞋身
鞋身一如以往，冇大改鞋型嘅情況下依然適合闊腳嘅波友。
圖五：鞋踭
T9都依然係用緊較為傳統嘅鞋踭，將海棉加厚以及用絨布包返好條邊。T10嘅鞋踭就會見到明顯改進，利用返之前T8嘅彈性物料去做個邊邊位，留意返從後影嘅呢張圖，以往嘅刮腳位喺今次用咗軟身但唔太薄嘅網紋物料代替，同T9有明顯分別，改善返上一代嘅刮腳問題之餘，整體上更方便球員穿著。
圖六：鞋領
T9同T10喺鞋舌嘅整體構造上分別都唔太大，主要分別係T9用返以往常用嘅分離式鞋舌，而T10就活用咗彈性較高嘅一體式鞋舌。
圖七：鞋釘
鞋釘喺今次T10嘅公佈上未見到有太大差別，只有喺排列上同釘嘅大細做咗適量嘅微調，而Tiempo系列喺鞋釘度一向都唔太aggressive，以保護力行先，所以大部份釘都會以圓釘為主。
總結：作為取消袋鼠皮後嘅第一個款式，T10嘅關注度都相當高，用鞋面增加嘅功能去彌補返質料上嘅下降。相信大家都會好奇鞋面嘅合成皮可唔可以成為完美嘅替代品，合適嘅話又點樣延伸落去其他系列呢？小編同大家一齊拭目以待！
