作為一個普通嘅消費者，相信大家經常面對一個問題：究竟我買件貨係真定假？ 特別係當而家波砵越黎越貴嗰陣，大家都想「買平啲」。今次喺受害波友手中拎咗對鞋嚟分析同討論一下真假呢個問題，同時講一講一啲你以為係假但係真嘅鞋。太長唔想睇嘅話 (Too Long Didn’t Read)：
- 非皮革類波砵（即Mercurial、X、Future等）嘅真假差別少，需要對比及有一定知識先可以分辨到
- 喺對鞋上面，真假最大差別嘅會係 (1) 鞋型、 (2) 鞋內Tag、 (3) 襪筒位置、(4) 鞋面新設計/複雜設計嘅表現及 (5) 重量
- 鞋盒、配件、牛油紙等都可以幫助考證（非決定性因素，但可幫助你考慮）
第 1 部份：真假迷思
作為一個普通嘅消費者，相信大家經常面對一個問題：究竟我買嘅野係真定假？ 當而家波砵越黎越貴果陣，大家都想「買平啲」。一路而嚟，我地都比較少討論呢個問題，因為波砵嘅假貨只要喺鞋款或者購買方式兩方面細心對比一下，聰明嘅你都可以搵到答案，唔需要我哋標明「正版正貨」。但係隨著我哋接觸到越嚟越多嘅波友，當中有啲係專家，但有時有啲只係跟人買，乜都唔識，就算唔喺我哋度買，都會有以上嘅疑問。所以，今個專欄我哋會深入剖析一下呢個比較少討論嘅問題。
首先，香港賣水貨（平行進口貨品，不經由總公司直接或者間接授權的代理商入口）非常普遍而合法，好似電器、衣物、大部份你買到嘅潮鞋等等。好多情況下，香港市場太細，官方/授權代理對傳統批發入貨再出售的商業模式無太大興趣，特別係香港客量不多，代理商好多時都唔會拎到最受歡迎嘅貨品。市場就慢慢孕育出不同嘅水貨商喺世界各國入貨，為消費者帶來多啲不同嘅款式或者相宜價錢嘅產品。當然有利就有弊，一啲低技術門檻嘅產品，例如衣物、鞋， 都好容易出現假貨。喺正「世界工廠」隔離，香港都不例外有好多人都有機會接觸過假嘅產品。
最近，有相熟波友喺某網買中咗假鞋之後問我哋意見（我哋唔提供驗正貨服務的，我哋唔係Nike/Adidas/Puma，只係借呢個機會同大家拆解一下）。咁啱早前又有同一款鞋嘅正貨庫存，所以決定寫返篇真假對比分析畀各位參考一下，尤其當而家喺唔少平台（如Carousell及Facebook）都有時出現假鞋。知己知彼，百戰百勝。
第 2 部份：案例分析 Nike Mercurial Superfly 8 Elite FG (貨號 CV0958-403)
是次研究主角係Nike 2021年推出嘅Merucrial Superfly 第8代 Impulse Pack 歐國杯湖水綠配色，碼數為US 8.5（EU 42 / 26.5CM）。全系列8代 Superfly 現時已賣完，唔使DM，要買就買9代，謝謝。
特別討論Mercurial系列係因為 1) Mercurial喺所有波砵之中最受歡迎，因此亦係最多仿製品嘅系列； 2)因為其合成纖維嘅鞋面構造，仿制會比起皮製波砵容易。Mercurial Superfly 8代主要包含以下Nike最新嘅科技同設計：
- Vaporposite 纖維彈性輕薄鞋面
- Flyknit 彈性鞋領
- ACC 全天候塗層
- 輕量鞋底及鞋釘設計改善加速度
第 2.1 部份：假貨來源
由近幾代開始，「莆田」足球鞋愈黎愈多，亦都愈來愈以假亂真。大部份呢類型假波砵都係來自福建沿海中部莆田市的鞋廠，透過不同銷售平台嘅漏洞擴散到全國，甚至全球不同嘅地方。大家係 Instagram 上面碌波砵嗰陣，有時都可能會見到有啲南美地區嘅Instagram Account喺度賣緊一啲從未見過嘅配色，嗰啲都幾大機會係假鞋嚟。
透過Google 搜尋「莆田足球鞋」都有好多不同結果，同款的波砵只賣緊人民幣336元 (約HK$382港元) (如圖)。其實除左「莆田」兩字同埋價錢低得不合理，橫睇掂睇，無論配色、用料，甚至Nike 的大剔號商標，都好明顯有意模仿Nike嘅真貨。
第 2.2 部份：鞋盒及配件
(由此部份開始，左為假貨，右為正貨)
1. 紙盒同樣用上Nike 頂級版常用銀色字盒，除咗顏色之外目測分別不大，但顏色並唔係一個有效而恆常可區分真假嘅元素。
2. 鞋盒面Tag上資料對比，目測分別不大，字型甚至係一樣。
3. Nike 真貨鞋盒Tag 底用上其中一項技術RFID Tag，除咗可追查貨品來源之外，都有防偽作用；假鞋盒上未見有用上RFID Tag。
4. 打開盒後，真貨配有鞋袋（注意：未有鞋袋不等於假貨，可以有好多原因，如遺失等，甚至大家平時出國行Outlet都會見到有時係無鞋袋，有時係比人偷咗，有時係可能對鞋原本係供應比專業球員，而呢啲鞋唔會有鞋袋）
5. 牛油紙 — 真貨用返平時Nike Logo嘅牛油紙，而今次呢對假貨呢方面就有明顯嘅分別，但無對比下都係好難分，亦不排除有其他假貨會印刷真嘅牛油紙。
第 2.3 部份：鞋身
1. 整體鞋型—雖然比較難掌握，但一般假鞋嘅鞋型都係比較飽滿而無線條，特別係腳面位置比較平坦，而真鞋嘅鞋型會更貼近腳嘅形狀，更有線條，而以上嘅鞋型分別喺襪筒及鞋領嘅位置更明顯。同時，假貨嘅鞋頭比較飽滿，最前嘅位置造得好硬（相信係想增強假貨嘅耐用性），但真貨鞋身最前嘅位置柔軟度更高，鞋頭都無咁鈍。
2. 鞋頭—未有太大決定性嘅差距，但對比下都可以見到分別。
3. 鞋跟—同鞋頭嘅比較一樣。
4. 鞋底—因技術含量比其他位置相對低，都係倒模做，所以真假分別不大，除咗顏色（正如前文所講，顏色並唔係一個決定性因素，例如如果對鞋鞋底氧化咗嘅話都會變色）
5. 鞋內側—Vaporposite雙層物料係真貨下更有層次，網格更為清晰，分色更明顯，底層可見度非常高，而C字型嘅裝飾（相信係固定後爭用）立體感更明顯。
6. 鞋外側—同鞋內側嘅分別一樣。
7. 鞋上方—鞋面上，同鞋內側/外側有關Vaporposite物料嘅對比一樣；襪筒上，正貨嘅編織紋理，特別喺鞋帶位置附近，比假貨更複雜及不規律；摸上手，真貨嘅彈性都非常高，高到有時係會凹咗入去（見圖），但假貨永遠堅挺，織物無層次感。
8. 鞋舌及鞋筒—鞋面上，同鞋上方嘅比較一樣，正貨更有層次感。
9. 鞋釘—同上面討論鞋底嗰Part差唔多，但近睇下見到有唔少Detail位有明顯分別。
10. 長度及闊度—假貨闊啲，US8.5下闊成4mm (87.50mm 真貨 vs 91.76mm 假貨)，可能因為要同時用同一個內籠嘅模整唔同款嘅鞋。同時，假貨都係長少少。
10. 重量—假貨重好多！呢個係一個決定性因素，因為即使外型幾似，重量都好難100%做到一樣，因為每隻物料嘅配搭，份量等等都係獨一無二嘅，呢樣相信係最大嘅差別，但當去到幾他更重嘅系列，差距可能會減少。即使如此，教大家一招—可以係Youtube睇睇真貨嘅開箱文，睇下佢地開箱果對嘅Size係咪你嘅Size，搵搵有無磅到重（有時啲Review會有架），咁就可以幫助你分辨。
第 2.4 部份：鞋內
1. 鞋墊—未有決定性分別。
2. 內籠—顏色不同，唔係色差問題，而係一隻黑色一隻黃色，但都係未決定性嘅因素，要拎埋唔同產地嘅同款鞋做比較先可以斷定。
3. 鞋Tag—字體，大小，排列等等完全不同，好易分，但諗唔透嘅位係點解假鞋鞋盒面嘅Tag就做得咁似，鞋入面就咁大分別。
第 2.5 部份：小總結
左右對比下當然有好大分別，而最決定性嘅因素包括 (1) 鞋型、 (2) 鞋內Tag、 (3) 襪筒位置、(4) 鞋面新設計/複雜設計嘅表現及 (5) 重量。鞋盒、配件、牛油紙等都可以幫助考證（非決定性因素，但可幫助你考慮）。但若然無對比下，又能唔能夠咁容易分別真偽呢？ 我哋每日接觸咁多波砵，無對比下都唔敢咁武斷講可以，畢竟假貨某啲位置係造得好真，而唔同系列嘅真假差別都唔一定係以上四個因素最明顯。
第 3 部份：真與假，就咁睇鞋就分到？
第 3.1 部份：杜絕假貨的難度
前文提及鞋作為技術門檻不高嘅產品（至少唔及晶片咁高端），官方品牌商喺造鞋嘅時候亦需要考慮成本問題，好難去考慮加入一啲高科技嘅防偽方法。佢哋一般會將鞋廠設立起發展中國家，例如中國、越南、波斯尼亞等等，去降低生產成本，廠商成功學習造鞋嘅技術後，就會出現技術外流嘅情況。
其實什麼睇鞋Tag分別真偽嘅方法全部都不可靠，因為鞋Tag都係要有人做出嚟，都係透過印刷技術，有心抄嘅有幾難抄啊。我哋都唔排除大牌子收埋左啲秘密武器，用黎俾佢哋認返鞋嘅真偽，而假鞋廠係唔知情。但至少一般消費者就無渠道接觸同證偽，甚至拎實物去官方門市都唔會幫你認證真偽。
第 3.2 部份：你以為係假貨嘅真貨—地區性品牌合作
唔少跨國品牌/企業通常會為了拓展某個地區或國家業務，會選擇已在該地區深入紮根的本土企業進行合作，或者品牌嘅本地分部都有唔少自由度去自行推出唔同嘅合作。例如香港麥當勞早餐就有扭扭粉，其他地區無，咁你會唔會話扭扭粉係假？同樣地，波鞋/波砵世界亦有好多類似情況。
「國情」關係，中國經常出現好多唔同地區化合作產品，例如2019年C朗推出嘅紅金Mercurial Superfly；美津濃中國一直都同唔少大型零售商推出只限中國嘅袋鼠皮AG底Morelia等等。同時，有時某啲Premier 3嘅配色只會係亞洲及美洲地區出現，歐洲並沒有，反之亦然。
除左中國有國情，有啲地區例如日本，都會有唔少地區限定版本。最常見就係日本地區先有嘅HG(Hard Gound)釘鞋底 (詳細可閱讀：鞋釘與場地 – BOOTMEISTER 波砵專門店 ）。
跳出亞洲，歐洲著名足球用品零售商Unisports都一直有同Puma推出聯乘版本，例如以下呢對，同埋最近推出嘅 Puma Ultra/Future Astronaut 版本。Pro:Direct Soccer最近都推出咗Predator Accelerator嘅重製，只限佢哋網站發售。
就住呢個方向，兩年前Adidas推出咗一個好好嘅例子，就係F50嘅復刻版，要分別係六個唔同嘅歐洲或美洲零售商購入，官網都係無，我哋嗰陣都好辛苦先儲齊曬六款。
新款都仲有好多網上資訊check到係唔係有出過，但舊款就真係好難check了，例如20年前出嘅鞋款，網上資訊及圖片真係唔多：
除此之外，品牌嘅地區分部都會同地區零售商合作出產品，總公司可能知，但可能都唔知。所以有時大家見到啲特別配色，先唔好咁快下定論，怪事無奇不有。以上嘅合作，導致本來已經難以辯別真偽嘅市場更加混亂，更加難去驗證，特別係一般消費者只係以某幾個指標（例如官網有無賣？香港有無？Pro:Direct Soccer有無？）來作考慮嘅話，有時可能會將假鞋當真，真鞋當假。當然，如果係普通消費者自己上網想尋寶嘅話，就要自己承擔風險做好Research。
第 3.3 部份：球員版
點解你對Vapor Elite係橙色盒？點解無鞋袋？點解你隻SG釘底唔係Anti-clog鞋底？波砵世界仲有一個都市傳說 — 球員版。單單係呢個Topic 其實已值得另一篇文章去詳細講講（詳見https://www.bootmeister.com/elite-version/）。
所謂「球員版」出現其實好合理，個別球星隻腳大細闊窄都唔同，自然好需要品牌商去特別訂製一對全球獨一無二嘅鞋。呢類球員版從來都唔會經一般零售途徑流出，品牌商又唔會出面認可有或無出過任何「球員版」，咁嘅情況下究竟算真定假？
第 4 部份：真與假，就咁睇鞋就分到？
有時明買明賣，好似馬雲早年講 「二十五蚊就想買一個勞力士手表，這是不可能的，這是你自己太貪了」，見到四百蚊有找，買到原價近二千蚊頂級版，買假只不過係你太貪心。如果無人貪平買假或者無不法商人埋沒良心賺黑心錢，造假商無利可圖自然就無人生產假鞋。不過，更多時係不法商人聲稱自己係真貨、溝貨，咁作為消費者就真係十分無辜。 當然分別真假嘅責任絕對唔應該喺買家身上，賣假商人係有100%責任。故意賣假唔只係犯法，絕對係道德缺失，成個行業畀你搞軭晒！
而面對偽品，比起加入唔同防偽技術，大品牌商俾出嘅答案好明顯，就係要保證真貨就去官方門市/網上門市買，一來唔使投入金錢， 二來大家直接去買佢賺多啲。商業考量其實好合理，最近大家睇新聞都見到Foot Locker全球大收縮，唔做門市，就可以見到近一兩年大牌子對分銷店嘅壓力。不過，消費者就會受影響，價格無競爭變相買貴啲，同時唔可以一間鋪睇曬幾個品牌嘅鞋，迫你歸邊，去到最後水貨仍然有市場，假貨又杜絕唔到。歐洲政府與其諗限制用USB-C叉電頭，會唔會又諗下喺呢方面點保障消費者呢？
