作為波砵史上最悠久嘅系列，遠喺Nike Mercurial以及Adidas Predator都未發行嘅時候，Puma King就已經屹立喺綠茵球場上，出名如比利、馬勒當拿同告魯夫亦曾經著上Puma King系列，可見當時係幾咁炙手可熱。但係近世代Nike同Adidas不斷進步同推出新系列，令到我哋都好少喺賽場上見到King嘅出現。
時不時我哋碌Instagram嘅時候，都會見到某某page總結吓呢個盃賽入面，球員用咩波砵入得最多波，交出最多助攻，入面經常都係Nike Mercurial同Adidas X叮噹馬頭，Puma波砵有時就連影都無。當然Puma都唔係不思進取，喺其他熱賣系列不斷進步嘅同時，佢哋曾經試過搵一個名氣十足嘅代言人，希望佢能夠將Puma King重新帶返去原有高度，當Neymar Jr.由代言Nike Mercurial到轉去Puma King嘅同時，Puma亦為佢特別設計一對亦都係唯一一對有Neymar logo嘅Puma King Platinum。可惜一年之後，Neymar就由King轉咗去著Future，而Puma嘅發展重心亦都隨著呢個轉變而有所變動。Puma King雖則以袋鼠皮為系列賣點，但由於設計上未能夠做到盡善盡美，包括著落依然有些少箍腳以及未用到最頂級袋鼠皮，同其他頂級系列比較下依然較為遜色。
Nike同Adidas宣佈黎緊唔會再用袋鼠皮嘅消息前，Puma其實都一早準備迎接呢一個moment。佢哋自家研發咗可以取代袋鼠皮嘅物料 – K-Better，呢樣用合成皮加埋環保物料造成嘅K-Better，聲稱擁有可以媲美袋鼠皮嘅柔軟程度，彈性加倍升級，但就比起以往薄咗30%，令重量拉低到單腳200gram左右。小編相信呢個決定最主要都係想追上市場嘅步伐，提供到舒適鞋款之餘亦唔可以有太鈍嘅感覺！另外，換咗仿皮亦都有增加到鞋嘅耐用度，掩蓋以往真皮波砵耐用程度較低呢一個明顯缺點，但講到話比過往耐用咗10倍，大家就要拭目以待啦！
喺Puma King嘅第55週年入邊，Puma亦推出咗呢一對以K-Better為主要物料嘅Puma King Ultimate。鞋面上嘅六邊形凹凸紋理係現時Ultra同Future都比較著重嘅特點，加強返對個波嘅控制同提供出色球感。而鞋側嘅彩色亦都係為咗致敬喺過往有份著過呢個系列嘅Legend，包括比利(黃色)、馬勒當拿(淺藍色)、告魯夫(橙色)、尤西比奧(紅色)同馬圖斯(白色)。
究竟呢一次嘅改動會唔會為球壇帶嚟革命性嘅影響？相信職業球員嘅選擇會帶黎最明確嘅分野，大家即管留意下一季，出場率高低就會顯示到呢個系列到底成功與否。
Source: Puma, Soccerbible
